काठमाडौं, १७ असोज – नेकपा एमालेका महासचिव शंकर पोखरेलले नयाँ पुस्ताको विश्वास जित्नका लागि पार्टी गतिविधिलाई प्रभावकारी ढंगले अघि बढाउन आह्वान गरेका छन्। उनले सामाजिक सञ्जालमार्फत दिएको भनाइमा नयाँ पुस्ताको आकांक्षा, माग र बलिदानको सम्मान गर्नुपर्ने कुरा उठाएका छन्।
महासचिव पोखरेलले भने, “नयाँ पुस्ताको आकांक्षा, माग र बलिदानको सम्मान गरौं। तर, यसको आवरणमा प्रतिगमनकारी हर्कत र विध्वंसको प्रयास गर्नु भनेको गलत हुनेछ। त्यसको विरोध गर्नुपर्छ।” उनले नयाँ पुस्ताको विश्वास जित्नका लागि पार्टी गतिविधि अझ प्रभावकारी बनाउन र जनतासँगको सम्बन्धलाई जीवन्त र घनिष्ठ बनाउने अपील गरेका छन्।
पोखरेलले जनपक्षीय जीवनशैली र आचरणमा जोड दिँदै आन्तरिक एकता, पार्टी पंक्तिको मनोबल उच्च बनाउने कुरा पनि उठाए। “संविधान र संघीय लोकतान्त्रिक गणतन्त्रको रक्षाका लागि हामी सबैलाई जागरूक बन्नुपर्नेछ,” उनले भने। उनले लोकतान्त्रिक शक्तिहरूसँगको सहकार्य र सम्बन्धलाई अझ मजबूत बनाउन पनि आग्रह गरेका छन्।
यस अवसरमा महासचिव पोखरेलले पार्टीका कार्यकर्ताहरूलाई एकजुट भएर जनताको सेवा गर्न र पार्टीको मूल उद्देश्यलाई समर्पित भएर अघि बढ्न आह्वान गरे।
