राष्ट्रिय परीक्षा बोर्डको परीक्षा नियन्त्रण कार्यालयका अनुसार कक्षा–१२ को मौका (पूरक) परीक्षा आजदेखि सुरु भएको छ । यसअघि भदौ २८ र २९ गतेका लागि तय गरिएको परीक्षा जेन–जी आन्दोलन हिंसात्मक भएपछि स्थगित भएको थियो ।
आज र भोलि (बुधबार) गरी दुई दिनसम्म सञ्चालन हुने परीक्षामा पहिलो दिन अनिवार्य अंग्रेजी (००४१) विषय र एक विषयमा मात्र परीक्षा दिने परीक्षार्थीका सबै विषयको परीक्षा हुने भएको छ । त्यस्तै, दुई विषयमा परीक्षा दिने परीक्षार्थीका लागि आफूले परीक्षा दिने विषयहरुमध्ये सानो कोड भएको विषयमा परीक्षा हुनेछ ।
अनिवार्य अंग्रेजी र नेपाली दुवै विषय परीक्षा दिने परीक्षार्थीले पहिलो दिन अंग्रेजी र दोस्रो दिन नेपाली विषयको परीक्षा दिनुपर्नेछ । बुधबार भने परीक्षार्थीले आफूले परीक्षा दिने विषयहरुमध्ये ठूलो कोड भएको विषयमा परीक्षा दिनुपर्नेछ । तर यस दिन अनिवार्य अंग्रेजीको परीक्षा हुने छैन ।
परीक्षा बिहान ११ बजेबाट सुरु हुने परीक्षा नियन्त्रण कार्यालयले जनाएको छ ।
