सप्तरी — सप्तरीको फत्तेपुरमा शनिबार दिउँसो नहरमा डुबेर एक बालकको ज्यान गएको छ।
नगरपालिका–१०, गंगाजलस्थित चन्द्रनहरमा नुहाउन गएका १२ वर्षीय स्थानीय बालक विशाल सदा डुबेर मृत्यु भएको इलाका प्रहरी कार्यालय कञ्चनपुरका प्रहरी नायब उपरीक्षक माधवप्रसाद काफ्लेले जानकारी दिनुभयो।
साथीसँग नुहाउन गएका विशाल पानीमा डुबेर बेपत्ता भएका थिए। खोजतलासका क्रममा घटनास्थलभन्दा करिब पाँच सय मिटर दक्षिणतर्फ भगिनीमा उनको शव फेला परेको प्रहरीले जनाएको छ।
शवलाई पोष्टमार्टमका लागि गजेन्द्रनारायण सिंह अस्पताल, राजविराज पठाउने तयारी भइरहेको र घटनाबारे थप अनुसन्धान भइरहेको प्रहरीले जनाएको छ।
