भारत सीमाक्षेत्र हुँदै ठूलो मात्रामा लागुऔषध भारततर्फ लैजान खोज्ने क्रममा एक भारतीय नागरिक पर्सामा पक्राउ परेका छन्।
सशस्त्र प्रहरी बलको गण नं. १३ बाट खटिएको टोलीले छिपहरमाई गाउँपालिका–४ बन्जारी नजिक चेकजाँच गर्ने क्रममा ३१ वर्षीय गुलाम मोहमदलाई नियन्त्रणमा लिएको हो। बिहार राज्य, पश्चिम चम्पारण जिल्ला, बेतिया–३७ का स्थायी वासिन्दा मोहमदले चलाइरहेको मोटरसाइकलबाट ९ किलो ५२२ ग्राम चरेश बरामद भएको प्रहरीले जनाएको छ।
उनको साथबाट आधार कार्ड र मोबाइल फोन समेत फेला परेको छ। बरामद चरेशसहित मोहमदलाई आवश्यक कारबाहीका लागि सम्बन्धित निकायमा बुझाउने तयारी गरिएको प्रहरीले जनाएको छ।
नेपाल–भारत सीमा क्षेत्रमा लामो समयदेखि लागुऔषध तस्करीका घटना दोहोरिँदै आएका छन्। सशस्त्र प्रहरी बलले सीमा नाकामा निगरानी कडा पारिए पनि तस्करहरूले विभिन्न बाटो प्रयोग गरी चरेश, गाँजा र अन्य निषेधित वस्तु सार्ने गरेको अधिकारीहरू बताउँछन्।
