नेपाल र वेस्ट इन्डिजबीचको तेस्रो तथा अन्तिम टी–२० अन्तर्राष्ट्रिय क्रिकेट आज हुँदैछ। खेल संयुक्त अरब इमिरेट्स (यूएई) को शारजाहमा राति सवा आठ बजेबाट शुरू हुनेछ।
नेपालले लगातार दुई खेल जितेर ऐतिहासिक शृङ्खला आफ्नो पक्षमा पारेको छ। पहिलो खेलमा १९ रनले जित्दै नेपालले पहिलोपटक आईसीसीको पूर्ण सदस्य राष्ट्रलाई हराएको थियो। त्यसपछि दोस्रो खेलमा वेस्ट इन्डिजलाई ९० रनले पराजित गर्दै नेपालले शृङ्खला नै जितेको हो।
दुई पटकको टी–२० विश्वकप विजेता वेस्ट इन्डिजविरुद्धको यो तीन खेलको ‘युनिटी कप’ नेपालका लागि आगामी आईसीसी टी–२० विश्वकप एशिया छनोटको तयारीसमेत हो।
