जिल्ला प्रशासन कार्यालय पर्साले असोज १७ देखि २० गतेसम्मका दिनलाई उच्च सतर्कता अपनाउन सर्वसाधारणलाई अनुरोध गरेको छ। जल तथा मौसम विज्ञान विभागको पूर्वानुमानअनुसार आगामी चार दिनसम्म कोशी, मधेश, बागमती, गण्डकी र लुम्बिनी प्रदेशमा भारी वर्षा हुने सम्भावना देखिएपछि प्रशासनले आकस्मिक जोखिमप्रति सचेत गराएको हो।
जिल्ला प्रशासनले वर्षाका कारण बाढी, पहिरो, डुबान तथा नदी–नाला र खोल्सामा आकस्मिक बहाव हुन सक्ने भन्दै अनावश्यक लामो दूरीको यात्रा नगर्न र विशेषगरी रात्रीयात्रा टार्न आग्रह गरेको छ।
सूचनामा विशेषत:
- सडकमा अवरोध वा अवरोधका कारण सवारी साधन थुनिन सक्ने भएकाले सम्भावित दुर्घटनाबाट जोगिन पूर्वतयारी गर्न,
- विपद्का बेला उद्धार, राहत तथा सुरक्षात्मक कार्य सहज बनाउन सुरक्षाकर्मी र सम्बन्धित निकाय तयार रहन,
- सरकारी तथा गैरसरकारी निकाय, स्वास्थ्य संस्था, सञ्चार माध्यम, नेपाल रेडक्रस, स्थानीय तह र विपद् व्यवस्थापन समितिहरू तयारी अवस्थामा रहन,
- नागरिकले सूचना तथा अपडेट पाउन ९११५५० टोल–फ्री नम्बर वा नजिकैको प्रहरी/सुरक्षा निकायलाई सम्पर्क गर्न सक्ने व्यवस्था गरिएको उल्लेख छ।
त्यस्तै, आपत्कालीन अवस्थामा एम्बुलेन्स, दमकल, उद्धार टोली लगायतका साधन तयारी अवस्थामा राख्न र यातायात व्यवस्थापन कार्यालयसँग समन्वय गर्न पनि निर्देशन दिइएको छ।
प्रशासनले दसैँमा हुने चहलपहललाई समेत ध्यानमा राख्दै यात्रा र उत्सव दुवैलाई सुरक्षित बनाउन सतर्कता अनिवार्य रहेको जनाएकाे छ।
