गएरातिदेखि लगातार वर्षा भएपछि लामो समयदेखि खडेरीको मार खेपिरहेका पर्सा जिल्लाका किसानहरू खुसी भएका छन्।
असार महिनादेखि अपेक्षित वर्षा नहुँदा धान रोपाइँ गर्न नसकेका किसानहरू चिन्तित बनेका थिए। खेतबारी सुकेर बाली रोप्न नसक्दा धान उत्पादनमा ठूलो क्षति हुने अनुमान गरिएको थियो।
तर गएरातिदेखि परेको वर्षाले खेतमा पानी जम्न थालेपछि किसानहरूले बाँकी रोपाइँ गर्ने सम्भावना बढेको छ। वर्षा सुरु भएपछि स्थानीय किसानले राहत महसुस गरेका छन्।
पर्सा भैरहवा, पकाहा, ठोरी, छिपहरमाई लगायतका क्षेत्रमा लगातार वर्षा भइरहेकाले माटो चिसिन थालेको छ। यसले समयमै रोपाइँ सम्पन्न गर्न सकिने किसानहरूको अपेक्षा छ।
कृषि प्राविधिकहरूले पनि पछिल्ला दिनमा परेको वर्षाले रोपाइँमा सकारात्मक प्रभाव पार्ने र धान उत्पादनमा ठूलो क्षति हुनबाट बचाउन सक्ने बताएका छन्।
