भदौ २३ र २४ गते जेन–जी आन्दोलनका क्रममा देशभरका विभिन्न कारागारबाट भागेका ६ हजार ५ सयभन्दा बढी कैदीबन्दीको विवरण सार्वजनिक गरिएको छ।
कारागार व्यवस्थापन विभागले सोमबार आफ्नो आधिकारिक वेबसाइटमार्फत फरार कैदीबन्दीहरूको नाम, नागरिकता र कारागारको विवरणसहितको सूची सार्वजनिक गरेको हो।
विभागका अनुसार सार्वजनिक सूचीमा ५ हजार ८ सय ६८ जना नेपाली, ५ सय ४० जना भारतीय, र १ सय ८ जना अन्य विदेशी कैदीबन्दी समावेश छन्।
यद्यपि, अहिले सम्म ९ हजार ८ जना कैदीबन्दी पुनः पक्राउ गरी कारागार फिर्ता गरिएको विभागले जनाएको छ।
विभागका प्रवक्ताले भने, “फरार कैदीबन्दीहरूको खोजी तथा नियन्त्रणका लागि सुरक्षा निकायबीच समन्वयात्मक र सशक्त अभियान अघि बढाइएको छ।”
साथै विभागले फरार कैदीबन्दीहरूलाई लुकाउने, आश्रय दिने वा सहयोग गर्ने व्यक्तिहरूलाई समेत कानूनी रूपमा कसुरदार ठानी कारबाही गरिने चेतावनी दिएको छ।
विभागका अनुसार फरार सूचीमा समावेश कैदीबन्दीहरू हत्या, बलात्कार, लागुऔषध कारोबारदेखि ठगी र आर्थिक अपराधसम्मका मुद्दामा सजाय काटिरहेका थिए।
