जिल्ला प्रहरी कार्यालय बाराले सिम्रौनगढबाट काठमाडौँ जाँदै गरेको यात्रुवाहक बसबाट ५० हजार रुपैयाँ बराबरको अवैध पटाका नियन्त्रणमा लिएको छ ।
बुधबार राति प्रहरी चौकी बरियारपुरबाट खटिएको प्रहरी टोलीले महागढीमाई नगरपालिका–१ स्थित प्रहरी कार्यालय अगाडि बागमती प्रदेश ०३–००१ ख ३१२९ नम्बरको बस रोकेर चेकजाँच गर्दा बसको डिकीमा लुकाइ–छिपाइ राखिएका १६ बन्डल प्रतिबन्धित पटाका फेला पारेको हो ।
प्रहरी वरिष्ठ नायब निरीक्षक सिकिन्द्र साहको कमान्डमा खटिएको टोलीले बरामद गरेका पटाकाको अनुमानित मूल्य ५० हजार रुपैयाँ रहेको जनाएको छ ।
जिल्ला प्रहरी कार्यालय बाराका प्रवक्ता प्रहरी नायब उपरीक्षक (डिएसपी) विजय राज पण्डितका अनुसार, बरामद पटाकासहित आवश्यक कानुनी प्रक्रिया अघि बढाइएको छ ।
