देशका धेरै ठाउँमा हिजोदेखि जारी वर्षा र हिमपात भोलिदेखि क्रमशः घट्दै जाने मौसम पूर्वानुमान महाशाखाले जनाएको छ।
महाशाखाले आज जारी गरेको तीनदिने मौसमी बुलेटिनअनुसार आज कोशी, मधेश, गण्डकी र बागमती प्रदेशका केही स्थानमा ठूलो वर्षा हुने सम्भावना छ।
रातिदेखि नै कोशी र मधेशका धेरै भागमा पानी परिरहेको छ।
सबैभन्दा धेरै वर्षा मोरङ, सप्तरी र झापामा भएको महाशाखाले जनाएको छ।
त्यस्तै, उच्च पहाडी र हिमाली क्षेत्रमा हिमपात समेत भएको छ।
महाशाखाका अनुसार भोलिदेखि देशभर मौसममा सुधार हुँदै जाने छ।
भोलि कोशी प्रदेशका थोरै ठाउँमा र मधेश, बागमती तथा गण्डकीका पहाडी भू–भागमा हल्का वर्षा हुन सक्ने अनुमान गरिएको छ।
तर, ठूलो पानी पर्ने सम्भावना छैन।
यस्तै, बागमती र गण्डकीका उच्च पहाडी तथा हिमाली क्षेत्रमा हल्का हिमपातको सम्भावना भने रहन्छ।
भोलि राति कोशी, बागमती र गण्डकीका पहाडी भू–भागमा छिटपुट वर्षा र हिमपात हुन सक्ने महाशाखाले जनाएको छ।
पर्सि (शनिबार) कोशीका थोरै ठाउँमा तथा बागमती र गण्डकीका पहाडी भागमा हल्का वर्षा हुने अनुमान गरिएको छ।
