शुक्रबार बिहान चितवनमा भएको बस दुर्घटनामा ३३ जना घाइते भएका छन्। भरतपुर महानगरपालिका–९, टिकौली जंगल नजिक दुर्घटना भएको हो।
प्रहरीका अनुसार गौरबाट काठमाडौँतर्फ आउँदै गरेको बा.प्र.०३०० ख ०१२३ नम्बरको डल्फिन यात्रुवाहक बस इँटा लोड गरेर पार्किङ गरी राखिएको ना.६ ख ८१३ नम्बरको ट्रकमा ठोक्किँदा दुर्घटना भएको हो।
दुर्घटनामा बसका ३३ जना यात्रु विभिन्न रूपमा घाइते भएका छन्। उनीहरूलाई उपचारका लागि चितवनका विभिन्न अस्पतालमा पठाइएको प्रहरीले जनाएको छ।
घाइतेमध्ये केहीको अवस्था गम्भीर रहेको बताइएको छ।
प्रारम्भिक अनुसन्धान अनुसार दुर्घटना अत्यधिक गतिका कारण भएको हुन सक्ने अनुमान गरिएको छ। घटनास्थलमा प्रहरी टोली पुगेर ट्रक र बस दुवैलाई नियन्त्रणमा लिएर थप अनुसन्धान सुरु गरिएको चितवन जिल्ला प्रहरी कार्यालयले जनाएको छ।
