नेकपा (माओवादी केन्द्र) र नेकपा (एकीकृत समाजवादी) सहित नौ वटा वाम दलबीच आज एकता घोषणा हुँदैछ । माओवादी केन्द्रका नेता अग्नि सापकोटाका अनुसार एकताको घोषणा आज दिउँसो १ बजे काठमाडौंको भृकुटीमण्डपमा हुने कार्यक्रम तय भएको छ ।
नयाँ एकीकृत पार्टीको नाम “नेपाली कम्युनिस्ट पार्टी” रहने र चुनाव चिन्ह पाँच कुने तारा तय भएको छ ।
हिजो मात्र माओवादी केन्द्रको महाधिवेशन आयोजक समितिको बैठकले पार्टी एकताको प्रस्ताव पारित गरेको थियो ।
तर, एकताको यो प्रक्रियामा असन्तुष्टि पनि देखिएको छ । माओवादी केन्द्रका नेता जनार्दन शर्मा समूहले एकताको विरोध गर्दै छुट्टै अभियान सुरु गरेको छ । उता समाजवादीका सम्मानित नेता झलनाथ खनाल र महासचिव घनश्याम भुसाल पनि एकता कार्यक्रममा सहभागी नहुने भएका छन् ।
माओवादी अध्यक्ष **पुष्पकमल दाहाल ‘प्रचण्ड’**ले भने एमालेका पूर्व उपाध्यक्ष डा. भीम रावलसहित असन्तुष्ट नेताहरूसम्मलाई पनि एकता प्रक्रियामा जोड्ने प्रयास भइरहेको बताएका छन् ।
