भारतको बिहार राज्यमा आज भइरहेको पहिलो चरणको विधानसभाको निर्वाचनका कारण नेपाल–भारत सीमामा पर्ने धनुषाको जटही नाका आज बिहीबार बिहान ६ बजेदेखि साँझ ६ बजेसम्म बन्द गरिएको छ।
भारतीय प्रशासनले निर्वाचन अवधिभर सीमा क्षेत्रमा सुरक्षामा कडाइ गर्दै सम्भावित अवाञ्छित गतिविधि रोक्ने उद्देश्यले नाका बन्द गरिएको जनाएको छ। सो क्रममा नेपाल र भारत दुवै देशका सुरक्षाकर्मी सीमाक्षेत्रमा तैनाथ गरिएको छ।
जिल्ला प्रहरी कार्यालय धनुषाका प्रहरी नायव उपरीक्षक गणेशबहादुर बमका अनुसार, ‘निर्वाचन अवधिमा अवाञ्छित गतिविधि हुन नदिन चेकजाँच र निगरानी बढाइएको छ। शंका लागेका व्यक्तिहरूमाथि सोधपुछ भइरहेको छ र सीमा क्षेत्रमा सघन अनुगमन जारी छ।’
नाका बन्द हुँदा दुवै तर्फका सवारीसाधन र यात्रुहरूको आवागमन पूर्ण रूपमा रोकिएको छ।
भारतको बिहारमा पहिलो चरणको निर्वाचन अन्तर्गत आज १२१ विधानसभा सिटमा मतदान भइरहेको छ भने दोस्रो चरणको निर्वाचन नोभेम्बर ११ मा १२२ सिटका लागि हुने तय गरिएको छ।
