मधेश प्रदेशका मुख्यमन्त्री सरोजकुमार यादवको नियुक्ति विषयमा सर्वोच्च अदालतले आगामी आइतबार (कात्तिक ३० गते) प्रारम्भिक आदेश दिने संकेत गरेको छ।
न्यायाधीश नित्यानन्द पाण्डेयको इजलासले बुधबार सुनुवाइ गर्दै अन्तरिम आदेश जारी गर्ने वा नगर्ने विषयमा निर्णय गर्न आइतबार मितिमा पेशी तोकेको हो। सो दिन अदालतले मुख्यमन्त्री नियुक्ति र मन्त्रिपरिषद् गठनसम्बन्धी सम्पूर्ण कागजात तथा निर्णयहरू अध्ययन गर्ने तयारी गरेको छ।
कृष्णप्रसाद यादवसहित ७४ जना प्रदेश सांसदले दायर गरेको रिट निवेदनको प्रारम्भिक सुनुवाइपछि अदालतले दुवै पक्षलाई आइतबार छलफलका लागि उपस्थित हुन आदेश दिएको हो।
संयुक्त इजलासमा रहेका दुई न्यायाधीशले सरकार गठन प्रक्रियामा त्रुटि वा अन्य कैफियत देखिए प्रारम्भिक चरणमै अन्तरिम आदेश जारी गर्न सक्ने सम्भावना रहेको जनाइएको छ। यस्तो आदेश जारी भए मुख्यमन्त्रीलाई दीर्घकालीन प्रभाव पार्ने नीतिगत निर्णय तथा कामकाजमा रोक लगाउन सकिने देखिन्छ।
न्यायाधीश पाण्डेयको मंगलबारको आदेशमै यसै विषयको सङ्केत देखिएको थियो। सर्वोच्चले मंगलबार दर्ता भएको रिट तथा त्यसमा जारी आदेशको सम्पूर्ण फाइल आइतबारको सुनुवाइका क्रममा पेश गर्न पनि आदेश दिएको छ।
