नेपाल र भारतका सुरक्षा अधिकारीहरूले दुई देशको अन्तर्राष्ट्रिय सीमामा आवागमन व्यवस्थित र सुरक्षित बनाउन ‘रियल टाइम रेकर्ड’ राख्ने र साझा सुरक्षा गस्ती गर्ने सहमति गरेका छन् ।
दिल्लीमा सम्पन्न नवौं ‘नेपाल–भारत सीमा सुरक्षा समन्वय बैठक’ले दुवै देशका बोर्डर आउट पोस्ट (बीओपी) र पर्यटक हेल्प डेस्कमार्फत आवागमन अभिलेख राख्ने निर्णय गरेको हो।
सशस्त्र प्रहरी महानिरीक्षक राजु अर्याल र भारतीय सशस्त्र सीमा बलका प्रमुख सञ्जय सिंघलको नेतृत्वमा सम्पन्न बैठकमा गैरकानुनी घुसपैठ, भन्सार छली/तस्करी, लागूऔषध, तेस्रो देशका नागरिकको अनधिकृत प्रवेश लगायतका विषयमा छलफल भएको थियो ।
साथै, २४ सै घण्टा सीमा क्षेत्रमा जोखिम मूल्याङ्कन गर्दै संयुक्त सुरक्षा गस्ती गर्ने योजना पनि बनाइयो।
नेपालले भारतमार्ग हुँदै भित्रिने तेस्रो देशका नागरिक, औषधि तस्करी र जेन–जी आन्दोलनपछि भागेका कैदीबन्दी नियन्त्रणमा सहयोगको माग गरेको थियो ।
भारतले यी चुनौतीमा सहकार्य गर्ने प्रतिबद्धता जनाएको छ।
