बंगलादेशको ढाकास्थित विशेष अदालतले पूर्वप्रधानमन्त्री शेख हसिनालाई भ्रष्टाचार र षड्यन्त्रसम्बन्धी ३ वटा धोखाधडी मुद्दामा २१ वर्षको जेल सजाय सुनाएको छ। प्रत्येक मुद्दामा ७–७ वर्षको कैद तोकिएको छ।
अदालत विशेष न्यायाधीश–५ मोहम्मद अब्दुल्लाह अल मामुनले यो फैसला सुनाएका हुन्। हसिनाका छोरा सजीब वाजेद जोयलाई ५ वर्षको कैद र एक लाख टाका जरिवाना तोकिएको छ भने छोरी साइमा वाजेद पुतुललाई पनि ५ वर्षको जेल सजाय सुनाइएको छ। बाँकी ३ मुद्दाको फैसला आगामी डिसेम्बर १ मा सुनाइने छ।
बंगलादेशको भ्रष्टाचार विरोधी आयोग (एसीसी)ले गत जनवरीमा हसिना र उनका परिवारका सदस्यहरूलाई पूर्वाचल क्षेत्रमा सरकारी प्लट गैरकानूनी रूपमा बाँडेको आरोपमा ६ वटा छुट्टाछुट्टै मुद्दा दायर गरेको थियो।
यसअघि बंगलादेशको अन्तर्राष्ट्रिय अपराध न्यायाधिकरण (आईसीटी)ले सन् २०२४ जुलाईमा शेख हसिनालाई सरकार विरोधी आन्दोलन दमनको क्रममा मानवता विरुद्ध अपराध गरेको ठहर गर्दै मृत्युदण्डको सजाय सुनाइसकेको थियो । आईसीटीले उक्त घटनामा मानवअधिकार उल्लंघन भएको बताउँदै कडा कारबाही गरेको थियो।
