मधेश प्रदेशका मुख्यमन्त्री सरोजकुमार यादवले आज दिउँसो २ बजे विश्वासको मत लिनुहुने भएको छ। प्रदेशसभा सचिवालयले बिहान साढे ८ बजे बैठक बोलाए पनि मुख्यमन्त्री तथा एमाले सांसदहरू उपस्थित नभएपछि बैठक उपसभामुखले सारेर दिउँसो २ बजे तय गरिएको हो।
सर्वोच्च अदालतले सोमबार २४ घण्टाभित्र विश्वासको मत लिन परमादेश दिएको थियो। मुख्यमन्त्री यादवले परमादेशको पत्र हिजो दिउँसो मात्र प्राप्त भएको भन्दै त्यसपछि सचिवालयलाई पत्र पठाएका थिए।
यादवको नियुक्तिमाथि ७४ सांसदले रिट दायर गरेपछि उत्पन्न विवादले मधेशको सत्ता समीकरण अझ जटिल बन्दै गएको छ।
