गोवाको ‘बर्च बाइ रोमियो लेन’ नाइटक्लबमा आइतबार राति भएको आगलागीमा पाँच जना नेपालीसहित २५ जनाको मृत्यु भएको थियो । घटनामा संलग्न सञ्चालक सौरभ र गौरव लुथरा दाजुभाइलाई थाइल्यान्डमा पक्राउ गरिएको भारतीय अखबार ‘द हिन्दुस्तान टाइम्स’ले जनाएको छ ।
दाजुभाइहरू घटनालगत्तै गोवाबाट फरार भएका थिए र अहिले भारत फर्काउने प्रक्रिया अघि बढाइएको छ । आगलागीमा मृत्यु हुने नेपालीमध्ये सिन्धुलीका लीलबहादुर कटवाल, झापाका सविन विश्वकर्मा, दाङका चूर्णबहादुर पुन, डडेल्धुराका मनोज झोरा र टिकाराम विक रहेका छन् । चार जनाको शव नेपाल फर्काइएको छ भने एकको शव भारतकै हरिद्वारमा अन्त्येष्टि गरिएको छ ।
गोवा प्रहरीले पाँच जना प्रबन्धक र कर्मचारीलाई पक्राउ गरेको छ भने लुथरा दाजुभाइविरुद्ध केन्द्रीय अनुसन्धान ब्युरो (सिबिआई) को अनुरोधमा इन्टरपोलले ब्लूकर्नर नोटिस जारी गरेको छ। ।।
घटना भएको रात उनीहरूले ‘मेक माई ट्रिप’ मार्फत थाइल्यान्डको हवाई टिकट बुक गरेका थिए । गोवा प्रदेशका मुख्यमन्त्री प्रमोद सावन्तले घटनाको छानबिन प्रतिवेदन आठ दिनभित्र सार्वजनिक हुने जानकारी दिएका छन् ।
