वीरगञ्ज।
नेपाल कम्युनिष्ट पार्टी (एमाले) पर्सा क्षेत्र नम्बर–१ का प्रतिनिधिसभा सदस्य उम्मेदवार तथा पूर्वमन्त्री प्रदीप यादवले आफूले विगतमा गरेका विकासका कामका आधारमा जनताले फेरि न्याय गर्नेमा आफू विश्वस्त रहेको बताएका छन्।
आज बिहान वीरगञ्जमा नेपाल कम्युनिष्ट पार्टी (एमाले) का नेता तथा कार्यकर्तासँगको भेटघाटमा उम्मेदवार यादवले भने,
“मैले के काम गरेँ भन्ने कुरा जनता स्वयंले देखेका छन्, अब अन्य नेताहरूले के–कस्ता काम गरेका छन् भन्ने प्रश्न जनताले सोध्नुपर्ने बेला आएको छ।”
आफ्ना विपक्षी उम्मेदवारलाई कडा प्रतिस्पर्धा दिँदै आएका यादवले निर्वाचन क्षेत्रमा सडक, पुल–पुलेसा, धर्मशाला, विवाह मण्डप, शिक्षा, स्वास्थ्य, खानेपानी तथा अन्य भौतिक पूर्वाधार विकासमा आफूले उल्लेखनीय योगदान दिएको दाबी गरे। ती कामप्रति मतदाताहरूले खुलेर प्रशंसा गरिरहेको पनि उनले बताए।
निर्वाचन आचारसंहिता भित्र रही फागुन ४ गतेदेखि प्रचार–प्रसारका गतिविधि औपचारिक रूपमा अघि बढाइने जानकारी दिँदै यादवले यसपटक बाँकी रहेका विकास योजनाहरू पूरा गर्नुका साथै जनतासँग प्रत्यक्ष राय–सल्लाह गरेर थप योजना अघि बढाइने प्रतिबद्धता जनाए।
संविधान, लोकतन्त्र र मधेशी जनताको हक–अधिकारको संरक्षणमा आफू सदैव अडिग रहने उल्लेख गर्दै उनले प्रतिनिधिसभामा जनताको आवाज मजबुत रूपमा उठाउने स्पष्ट पारे।
“म नेता होइन, जनताको सेवक हुँ,” भन्दै यादवले जनताले फेरि सेवा गर्ने अवसर दिनेमा आफू आशावादी रहेको जिकिर गरे।
