काठमाडौं । अबदेखि आवेदन दिएकै दिन श्रम स्वीकृति पाइने भएको छ । श्रम, रोजगार तथा सामाजिक सुरक्षा मन्त्रालयको निर्देशनपछि वैदेशिक रोजगार विभागले टोकन प्रणाली हटाउँदै सोही दिन श्रम स्वीकृति दिने व्यवस्था लागू गरेको हो ।
यसअघि टोकन प्रणालीमार्फत सीमित संख्यामा मात्रै श्रम स्वीकृति प्रदान गरिँदै आएको थियो । अब आवश्यक कागजात पूरा भएको अवस्थामा सेवाग्राहीले आवेदन दिएको दिनमै श्रम स्वीकृति तथा पुनः श्रम स्वीकृति पाउनेछन् ।
श्रममन्त्री दिपककुमार साहको उपस्थितिमा बसेको बैठकले सेवा सुधार गर्ने निर्णय गरेसँगै उक्त व्यवस्था लागू गरिएको हो । सरकारले श्रमिकको सुविधा, सुरक्षा र सेवा सहज बनाउन यस्तो कदम अघि बढाएको जनाएको छ ।
