वीरगञ्ज, १ वैशाख । पर्साको पोखरिया नगरपालिका–७ स्थित महोबनी पदम माध्यमिक विद्यालयमा भारत सरकारको सहयोगमा नयाँ विद्यालय भवन निर्माण सुरु गरिएको छ ।
करिब ७ करोड २५ लाख रुपैयाँको लागतमा तीन तल्ले भवन निर्माण हुन लागेको हो । मंगलबार वीरगञ्जस्थित भारतीय महावाणिज्य दूतावासका महावाणिज्यदूत देवी सहाय मिना र पोखरिया नगरपालिकाका मेयर प्रदुमन प्रसाद चौहानले संयुक्त रूपमा भवनको शिलान्यास गरेका हुन् ।
नेपाल–भारत विकास सहयोग कार्यक्रम अन्तर्गत निर्माण हुन लागेको भवनका लागि ६ करोड ५३ लाख रुपैयाँ भारत सरकारले तथा ७२ लाख रुपैयाँ पोखरिया नगरपालिकाले व्यहोर्नेछ ।
शिलान्यास कार्यक्रममा स्थानीय जनप्रतिनिधि, विद्यालय व्यवस्थापन समितिका पदाधिकारी, शिक्षक–शिक्षिका, विद्यार्थी तथा अभिभावकहरूको उल्लेख्य उपस्थिति रहेको थियो ।
