वीरगञ्ज । आजदेखि विक्रम संवत् २०८३ प्रारम्भ भएको छ । वैशाख १ गते वर्षको पहिलो दिनका रूपमा देशभर एकआपसमा शुभकामना आदानप्रदान गर्दै हर्षोल्लासका साथ नयाँ वर्ष मनाइँदैछ ।
नेपालमा वैशाख १ गतेलाई नयाँ वर्षका रूपमा मनाउने परम्परा रहिआएको छ । विक्रम संवत् सबैभन्दा पुरानो संवत् मानिन्छ र यही संवत्को आज पहिलो दिन हो । सूर्यले मीन राशिको भोग समाप्त गरी मेष राशिमा प्रवेश गर्ने दिनलाई वैशाख सङ्क्रान्ति अर्थात् मेष सङ्क्रान्तिका रूपमा पनि मनाइन्छ ।
सूर्यको गतिसँग सम्बन्धित भएकाले विक्रम संवत् वैज्ञानिक र शाश्वत मानिने विद्वानहरूको भनाइ छ । यस दिन पुरानो वर्षको समीक्षा गर्दै नयाँ वर्षका लागि योजना बनाउने र सङ्कल्प गर्ने चलन पनि रहेको छ ।
नयाँ वर्षको अवसरमा बिहानै नुहाउने, घर–आँगन सफा गर्ने, मठमन्दिरमा पूजा–आराधना गर्ने, मीठा परिकार खाने तथा आफन्त र इष्टमित्रसँग भेटघाट गरी शुभकामना साटासाट गर्ने परम्परा छ ।
विश्वभर रहेका नेपालीहरूले पनि आजको दिनलाई विशेष रूपमा मनाउने गर्छन् । भक्तपुरमा बिस्का जात्रा आयोजना गरिन्छ भने तराई क्षेत्रमा सहलेश फूल फुल्ने विश्वासका कारण यस दिनको छुट्टै महत्व रहेको छ ।
नयाँ वर्षको अवसरमा राष्ट्रपति रामचन्द्र पौडेल, उपराष्ट्रपति रामसहायप्रसाद यादवलगायत विभिन्न विशिष्ट व्यक्तित्वहरूले शुभकामना सन्देश जारी गर्दै देशवासीमा सुख, शान्ति, समृद्धि र प्रगतिका लागि कामना गरेका छन् ।
