सीमावर्ती भारतीय बजारबाट नेपालतर्फ ल्याइने सामानमा सरकारले नयाँ भन्सार नियम कडाइका साथ लागू गरेको छ। अब एक सय रुपैयाँभन्दा बढी मूल्यको वस्तु ल्याउँदा अनिवार्य रूपमा भन्सार घोषणा गरी कर तिर्नुपर्ने व्यवस्था गरिएको छ।
भन्सार विभागका अनुसार यात्रु सुविधासम्बन्धी नियम परिष्कृत गर्दै यो व्यवस्था कार्यान्वयनमा ल्याइएको हो। सीमावर्ती क्षेत्रमा सुरक्षाकर्मीले माइकिङमार्फत जानकारी दिँदै नियम पालना गर्न सर्वसाधारणलाई सचेत गराइरहेका छन्।
विभागले यो कदमले सीमावर्ती नेपाली बजारलाई संरक्षण गर्ने र अनियन्त्रित किनमेल प्रवृत्ति नियन्त्रण हुने अपेक्षा गरेको छ। विराटनगरसहितका भन्सार नाकामा समेत कडाइका साथ कार्यान्वयन सुरु गरिएको छ।
