बडादसैँको दोस्रो दिन आज सोमबार नवदुर्गाको दोस्रो स्वरूप ब्रह्मचारिणी देवीको पूजा आराधना गरिँदै छ। नवरात्रका अवसरमा देशभरका शक्तिपीठमा दर्शन तथा पूजापाठका लागि भक्तजनको चहलपहल बढेको छ।
धार्मिक परम्पराअनुसार घटस्थापना गरिएको स्थानमा ब्रह्मचारिणी देवीको आह्वान गरी विधिपूर्वक पूजा गरिन्छ। नवरात्रको पहिलो दिन घटस्थापना गरी जमरा राख्नुका साथै देवी शैलपुत्रीको आराधना गरिएको थियो।
धार्मिक ग्रन्थमा ब्रह्मचारिणी देवीलाई ब्रह्मज्ञान प्राप्तिको मार्गमा निरन्तर साधनारत देवीका रूपमा वर्णन गरिएको छ। उनको पूजा आराधना गर्नाले शक्ति, ऐश्वर्य र विद्या प्राप्त हुने धार्मिक विश्वास छ।
नवरात्रका नौ दिन दुर्गा सप्तशती, श्रीमद्देवीभागवतलगायत देवी स्तोत्र पाठ गर्ने चलन छ। नौ दिनको पूजापछि विजयादशमीदेखि कोजाग्रत पूर्णिमासम्म देवीको प्रसादस्वरूप टीका र जमरा लगाएर दसैँ मनाइन्छ।
यसै अवसरमा काठमाडौंस्थित हनुमानढोका दरबारको दसैँघरमा पनि ब्रह्मचारिणी देवीको विधिपूर्वक पूजा आराधना गरिँदै छ।
