वीरगञ्ज । प्रहरीले बाराबाट एक लाख मूल्य बराबरको भन्सार छलीका टेन्ट कपडा बरामद गरेको छ । विशेष सूचनाको आधारमा प्रहरीले भन्सार छली ल्याउँदै गरेको एक लाख ११ हजार ४ सय मूल्य बराबरका टेन्ट कपडा बरामद गरेको हो ।
इलाका प्रहरी कार्यालय अमलेखगञ्जबाट खटिएको प्रहरी टोलीले जितपुरसिमरा–२१ एरियाबाट टेन्टका कपडा बरामद गरेको प्रहरी प्रवक्ता प्रकाश सापकोटाले बताए । एनका अनुसार वीरगञ्ज नारायणगढतर्फ जाँदै गरेको ना ५ ख २१४८ नम्बरको बसबाट बिल बिजकभन्दा बढीका टेन्टका कपडाहरु पाइएपछि नियन्त्रणमा लिइएको हो ।
बरामद सामान आवश्यक कारबाहीका लागि आन्तरिक राजश्व कार्यालय पथलैयामा बुझाइएको प्रहरीले जानकारी दिएको छ ।
