वीरगञ्जलाई भारतीय सहर रक्सौलसँग जोड्ने मैत्री पुलबाट शुक्रवार एक बङ्गलादेशी नागरिक पक्राउ परेका छन् । भारतीय सीमा सुरक्षा बल (एसएसबी) ले बङ्गलादेशको कुम्मीला, ढाका निवासी अन्दाजी ५० वर्षीय सैयद इकबाल अहमदलाई नियन्त्रणमा लिएको हो ।
नेपालको बाटो प्रयोग गरी भारत प्रवेश गर्ने प्रयासमा रहेका अहमदसँग आवश्यक वैध कागजात नभेटिएपछि उनलाई पक्राउ गरिएको भारतीय सञ्चारमाध्यमहरूले जनाएका छन् ।
पक्राउ परेपछि उनलाई अनुसन्धानका लागि रक्सौलस्थित अध्यागमन कार्यालयमा राखिएको छ । प्रारम्भिक अनुसन्धानमा अहमदले भिसा बिना नै भारत प्रवेश गर्न खोजेको पुष्टि भएको छ ।
घटनापछि सीमामा सुरक्षा जाँच कडा पारिएको भारतीय अधिकारीहरूले जनाएका छन् ।
