नेपाली कांग्रेसका नेता तथा पूर्वमन्त्री मोहम्मद आफताब आलमलाई ज्यान मुद्दामा सफाइ दिने उच्च अदालत वीरगञ्जको फैसलाविरुद्ध सरकारले सर्वोच्च अदालतमा पुनरावेदन दर्ता गरेको छ।
महान्यायाधिवक्ता कार्यालयले फैसलामा असहमति जनाउँदै सोमबार सर्वोच्च अदालतमा पुनरावेदन दर्ता गराएको हो। कार्यालयका अनुसार आलमसहितका सबै आरोपितलाई दोषी ठहर गर्नुपर्ने मागसहित पुनरावलोकनको माग गरिएको छ। साथै, जिल्ला अदालतबाट सफाइ पाएका केही आरोपितहरूलाई समेत दोषी ठहर गरिनुपर्ने दाबी गरिएको छ।
२०६४ सालको संविधानसभा निर्वाचनको अघिल्लो दिन रौतहटमा भएको बम विस्फोटमा संलग्न रहेको आरोपमा आलमसहितका केही व्यक्तिहरू पक्राउ परेका थिए। आरोप अनुसार घटनामा घाइते भएकाहरूलाई उपचारको सट्टा इँटा भट्टामा हालेर ज्यान लिएको भनिएको थियो।
गत जेठ १४ गते उच्च अदालत वीरगञ्जले प्रमाण अभावको आधारमा आलमसहित सबै आरोपितलाई सफाइ दिएको थियो। त्यस फैसलापछि राजनीतिक वृत्त र सर्वसाधारणबाट तीव्र आलोचना भएको थियो।
सरकारी स्रोतका अनुसार फैसलाले न्यायमा प्रश्न उठाएको भन्दै कानुनी प्रक्रिया अन्तर्गत सर्वोच्च अदालतमा पुनरावलोकनको बाटो रोजिएको हो। अब सर्वोच्च अदालतले पुनरावेदनको प्रारम्भिक सुनुवाइपछि फैसलाको पुनरावलोकन गर्नेछ।
