लामो खडेरी र वर्षाको कमीका बाबजुद पर्सा जिल्लामा ९८ प्रतिशत धान रोपाइँ सम्पन्न भएको छ। कृषि ज्ञान केन्द्रका अनुसार साउन ३० गतेसम्म बहुदरमाई, जीराभावानी, धोबिनी, पकहाँमैनपुर र विन्दवासिनी गाउँपालिकामा शतप्रतिशत रोपाइँ सम्पन्न भएको छ भने वीरगञ्ज महानगरपालिका र कालिकामाईमा ९९ प्रतिशत, ठोरी गाउँपालिकामा भने ९० प्रतिशत मात्र रोपाइँ भएको छ।
किसानहरूका अनुसार वर्षा अभाव र बोरिङ सुविधा नहुँदा खेत चर्किएर रोपाइँ ढिलो भएको हो। यस वर्ष जिल्लामा करिब ३९–४० हजार हेक्टर क्षेत्रमा धान खेती गरिएको छ।
अब किसानहरू मलखादको जोहोमा चिन्तित छन्। कृषि ज्ञान केन्द्रले समयमै आपूर्ति गर्न स्थानीय तहसँग समन्वय भइरहेको जनाएको छ।
