कारागार कार्यालय नवलपरासीले भदौ २५ गते कारागारबाट फरार भएका कैदी–बन्दीलाई कसैले पनि आश्रय नदिन आग्रह गरेको छ।
गत भदौ २३ र २४ गतेको जेनजी युवा आन्दोलनपछि २५ गते नवलपरासी कारागारबाट ५४६ जना कैदी–बन्दी भागेका थिए। तीमध्ये केही कैदी–बन्दी स्वयं उपस्थित भइसकेका छन्।
कारागार प्रशासनका अनुसार फरार कैदीलाई घरमा लुकाउने वा आश्रय दिने व्यक्तिलाई समेत कानूनी कारबाही गरिनेछ। “कैदी–बन्दीलाई आश्रय दिएको वा लुकाएको पाइएमा उनीहरूलाई समेत कसुरदार ठानी कानूनी प्रक्रिया अघि बढाइनेछ,” विज्ञप्तिमा उल्लेख छ।
कारागार प्रशासनले फरार कैदी–बन्दीलाई यही असोज २० गतेसम्म हाजिर हुन अनुरोध गरेको छ। सो म्यादभित्र उपस्थित नभए कारागार ऐन, २०७९ र प्रचलित कानुनअनुसार कारबाही गरिने चेतावनी दिएको छ।
हालसम्म पुरुष २१९ र महिला ३२ गरी २५१ जना कैदी–बन्दी फिर्ता भइसकेको कारागार प्रशासनले जनाएको छ।
