टर्कीको उत्तर–पश्चिमी बोलु पहाडस्थित एक होटलमा भएको भीषण आगलागी प्रकरणमा अदालतले ११ जनालाई जन्मकैदको सजाय सुनाएको छ।
गएको जनवरी २१ मा भएको आगलागीमा ३० बालबालिकासहित ७८ जनाको ज्यान गएको थियो भने १ सय ३७ जना घाइते भएका थिए।
अदालतले बिहीबार सुनाएको फैसलामा सुरक्षा नियमको उल्लङ्घन र लापरबाहीका कारण दुर्घटना निम्त्याएको ठहर गर्दै होटलका मालिकसहित ११ जनालाई आजीवन कारावास सजाय दिएको हो।
अन्तर्राष्ट्रिय समाचार संस्था एएफपी का अनुसार, उक्त आगलागीमा बोलुका एक उपमेयर र स्थानीय अग्नि नियन्त्रक समेतलाई जेल सजाय सुनाइएको छ।
घटनापछि ३२ जनाविरुद्ध मुद्दा दायर गरिएको थियो। अनुसन्धानका क्रममा होटलमा जडान गरिएको आगलागी चेतावनी प्रणालीले काम नगरेको र केही ग्यास उपकरणहरूले सुरक्षा मापदण्ड पूरा नगरेको प्रमाणित भएको थियो।
अदालतको निर्णयपछि पीडितका परिवारले त्यसलाई स्वागत गरेका छन्।
