वीरगञ्ज नाका हुँदै चालू आर्थिक वर्षको पहिलो तीन महिनामा आठ अर्ब ७० करोड रुपैयाँ मूल्य बराबरका सवारीसाधन भित्रिएका छन्।
वीरगञ्ज भन्सार कार्यालयका अनुसार सो अवधिमा गाडी आयातबाट सात अर्ब ७७ करोड रुपैयाँ राजस्व सङ्कलन गरिएको छ।
गत आर्थिक वर्षको सोही अवधिमा छ अर्ब १९ करोड मूल्यका गाडी आयात भएका थिए भने राजस्व पाँच अर्ब ९५ करोड रुपैयाँ मात्र उठेको थियो।
भन्सार प्रमुख विष्णुप्रसाद ज्ञवालीका अनुसार, यस वर्ष गाडीको आयात र राजस्व दुवैमा वृद्धि भएको छ।
पहिलो तीन महिनामा मात्रै तीन अर्ब ४१ करोड रुपैयाँ मूल्यका २४ हजार ९३९ मोटरसाइकल आयात भएका छन्।
त्यस्तै ६८ करोड रुपैयाँ मूल्यका २२९ वटा विद्युतीय जीप, कार र भ्यान भित्रिएका छन्।
यी विद्युतीय सवारीसाधनबाट मात्रै ४५ करोड ७२ लाख रुपैयाँ राजस्व सङ्कलन भएको भन्सार कार्यालयले जनाएको छ।
