फागुन २१ गते हुने प्रतिनिधिसभा चुनाव नजिकिँदै गर्दा मतदाता नामावलीमा नाम दर्ता र नयाँ दल दर्ता गर्ने क्रम तीव्र बनेको छ। मतदाता र दल दर्ताका लागि आयोगले तोकेको समयसीमा कात्तिक ३० गते आइतवारसम्म रहेको छ।
निर्वाचन आयोग र जिल्लास्थित निर्वाचन कार्यालयहरूमा समयसीमा नजिकिँदै गर्दा भीड लागेको छ। आयोगका प्रवक्ता नारायणप्रसाद भट्टराईका अनुसार चुनाव घोषणा भएयता अहिलेसम्म २ लाख ९ हजार ५ सय २२ नयाँ मतदाता दर्ता भएका छन्।
यसैगरी चुनाव घोषणापछि २१ नयाँ दलले दर्ताका लागि आयोगमा निवेदन दिएका छन्। प्रमाणपत्र दिने प्रक्रिया जारी रहेकामा अहिलेसम्म १ सय २५ दल दर्ता भइसकेको छ।
पछिल्लो दिनमा नागरिक उन्मुक्ति पार्टी नेपाल (कबिर सोप नेतृत्व) नयाँ दलको रूपमा दर्ता भएको छ। यसैगरी हर्क साङपाङ नेतृत्वको श्रम संस्कृति पार्टी, दिनेशराज प्रसाईं नेतृत्वको गतिशील लोकतान्त्रिक पार्टी, राष्ट्रिय जनमुक्ति पार्टी र जनस्वराज पार्टी पनि नयाँ दलका रूपमा दर्ता भएका छन्। यस्तै, वामदेव गौतम नेतृत्वको नेपाल कम्युनिस्ट पार्टी एकता राष्ट्रिय अभियान खारेज भएको छ।
निर्वाचन आयोगले दल तथा सरोकारवालासँग छलफल गर्दै चुनाव सम्पन्न गर्ने तयारीलाई अघि बढाइरहेको छ। यसैबीच प्रधानमन्त्री सुशीला कार्कीले पनि सर्वदलीय बैठक आयोजना गरेर छलफल गर्नुभएको छ।
