वीरगञ्ज । वीरगञ्जमा बस जाँचका क्रममा बिलबिजकबिनाका करिब ६ लाख २६ हजार रुपैयाँ बराबरका यौनवर्धक तथा गर्भनिरोधक औषधि बरामद गरिएको छ।
सशस्त्र प्रहरी तथा भन्सार सुरक्षामा खटिएको टोलीले नियमित चेकजाँचका क्रममा एक यात्रुबाहक बसबाट उक्त औषधिहरू फेला पारेको हो। भारतबाट अवैध रूपमा भित्र्याइएको आशंका गरिएको ती औषधिहरूका लागि आवश्यक कागजात (बिलबिजक) प्रस्तुत गर्न नसकिएपछि नियन्त्रणमा लिइएको जनाइएको छ।
बरामद गरिएको औषधि करिब ६ लाख २६ हजार रुपैयाँ मूल्य बराबर रहेको बताइएको छ। नियन्त्रणमा लिइएका सबै सामग्री आवश्यक कारबाहीका लागि भन्सार कार्यालयमा बुझाइएको प्रहरीले जनाएको छ।
घटनाबारे थप अनुसन्धान भइरहेको सम्बन्धित निकायले जनाएको छ।
