काठमाडौं । जल तथा मौसम विज्ञान विभागको मौसम पूर्वानुमान महाशाखाले आज अपराह्न ४ बजेदेखि देशका विभिन्न भागमा तीव्र हावाहुरी चल्ने जनाएको छ।
महाशाखाले बिहान ८ बजे जारी गरेको विशेष बुलेटिनमा हावाहुरीको समय संशोधन गर्दै अपराह्न ४ बजेदेखि सुरु भई भोलि बिहान ६:४५ बजेसम्म जारी रहने उल्लेख गरेको छ। यसअघि हावाहुरी साँझ ५:४५ बजेदेखि सुरु हुने बताइएको थियो।
विभागका अनुसार मधेश प्रदेशका बारा, पर्सा र धनुषा, सुदूरपश्चिमका कञ्चनपुर, डडेलधुरा र डोटीमा हावाहुरीको बढी प्रभाव पर्ने सम्भावना छ।
त्यसैगरी लुम्बिनी प्रदेशका बर्दिया, बाँके, दाङ, अर्घाखाँची र परासी, गण्डकी प्रदेशको नवलपुर, बागमती प्रदेशको चितवन तथा कोशी प्रदेशका झापा र मोरङसहित आसपासका जिल्लाहरू पनि प्रभावित हुन सक्ने जनाइएको छ।
हावाहुरीसँगै मेघगर्जन, चट्याङ र असिनासहित वर्षा हुने प्रणाली पश्चिमबाट पूर्वतर्फ सर्ने भएकाले देशका धेरै स्थानमा असर पर्ने विभागले जनाएको छ।
सम्भावित जोखिमलाई ध्यानमा राख्दै सर्वसाधारणलाई उच्च सतर्कता अपनाउन विभागले आग्रह गरेको छ।
