वीरगञ्ज, २५ अषाढ । नवनियुक्त बन तथा वातावरण मन्त्री प्रदीप यादवलाई गृहनगर वीरगञ्जमा भव्य स्वागत गरिएको छ ।
मन्त्री नियुक्त भए पश्चात पहिलो पटक वीरगञ्ज पुगेका मन्त्री यादवलाई शनिबार हजारौँ कार्यकर्ता र स्थानीयले भव्य तरिकाले वीरगञ्जमा स्वागत गरेका हुन् ।
पर्सा क्षेत्र नम्बर १ बाट निर्वाचित प्रतिनिधिसभा सदस्यसमेत रहेका यादव पछिल्लो पटक मन्त्रिपरिषद विस्तार हुँदा गत सोमबार जनता समाजवादी पार्टी (जसपा) को तर्फबाट बन तथा वातावरण मन्त्री बनेका थिए ।
यादवलाई स्वागत गर्न वीरगञ्ज महानगरपालिकाका मेयर राजेशमान सिंहसहित अन्य नेता र कार्यकर्ताको टोली बाजागाजासहित सिमरा विमानस्थल पुगेको थियो । सिमरा विमास्थलबाट यादव स्वागत र्यालीसहित वीरगञ्ज पुगेको छन् ।
जसपाको केन्द्रीय सदस्यसमेत रहेका यादवले वीरगञ्ज पुग्न बितिकै घण्टाघरस्थित शहिद स्मारक पुगेर शहिदहरुको सालिकमा माल्यार्पण गरेका छन् । माल्यार्पण पश्चात यादव जसपाले आयोजना गरेको कार्यक्रममा सहभागी हुन् यहाँस्थित नगरसभा गृह (टाउन हल) पुगेका छन् ।
जसपाले नवनियुक्त मन्त्री यादवसहित पार्टीबाट निर्वाचित अन्य जनप्रतिनिधिका लागि आज सम्मान कार्यक्रमको आयोजना गरेको छ ।
पछिल्लो पटक परिवर्तन भएको मन्त्रिपरिषद्मा पार्टीले महेन्द्र राय यादवलाई फिर्ता बोलाउँदै वन तथा वातावरण मन्त्रीमा प्रदीप यादवलाई पठाएसँगै पर्साले मन्त्री पाएको हो ।
