वीरगञ्ज, २५ अषाढ । जनता समाजवादी पार्टी नेपाल (जसपा) बाट निर्वाचित जनप्रतिनिधिलाई सम्मानित गरिएको छ ।
जसपाले शनिबार यहाँस्थित नगरसभा गृह (टाउन हल) मा आयोजना गरेको स्वागत तथा सम्मान कार्यक्रममा भर्खरै सम्पन्न स्थानीय तहको निर्वाचनमा पार्टीबाट निर्वाचित जनप्रतिनिधिलाई सम्मानित गरीएको हो ।
जनप्रतिनिधिहरुलाई ननियुक्त बन तथा वातावरण मन्त्री प्रदीप यादवले प्रमाणपत्र र गम्छा ओढाएर सम्मानित गरेका थिए ।
कार्यक्रमका प्रमुख अतिथिसमेत रहेका मन्त्री यादवलाई पनि ५१ किलोको माला र चाँदीको मुकुट लगाएर सम्मानित गरिएको थियो ।
पर्सा निर्वाचन क्षेत्र नम्बर १ बाट प्रतिनिधिसभा सदस्यमा निर्वाचित सांसद् यादव मन्त्री बनेपछि उनको स्वागतको अवसरमा आयोजित कार्यक्रममा विभिन्न स्थानीय तहमा निर्वाचित प्रमुख, उपप्रमुख, अध्यक्ष, उपाध्यक्ष, वडा अध्यक्ष र वडा सदस्यहरुलाई सम्मानित गरिएको पार्टीको महानगर समितिका अध्यक्ष इश्वरचन्द्र यादवले बताए ।
कार्यक्रम पूर्व वीरगञ्जमा मन्त्री यादवको स्वागतमा एउटा ठूलो र्याली पनि निकालिएको थियो । र्यालीमा पार्टीका हजारौं नेता, कार्यकर्ता र स्थानीयहरुको सहभागिता रहेको महानगर समितिका अध्यक्ष इश्वर यादवले बताए ।
