वीरगञ्ज, १३ मंसिर । धनुषा निर्वाचन क्षेत्र नम्बर ४ मा नेकपा एमालेका रघुवीर महासेठ निर्वाचित भएका छन् ।
नेपाली कांग्रेसका सहमहामन्त्रीसमेत रहेका महेन्द्र यादवलाई हराउँदै महासेठ निर्वाचित भएका हुन् । महासेठ विजयी भएको निर्वाचन आयोगले पनि औपचारिक घोषणा गरिसकेको छ ।
निर्वाचित भएका महासेठले ३२ हजार ३ सय ३६ मत ल्याएका छन् भने यादवले ३२ हजार १ सय १२ मत ल्याएका छन् ।
२०७४ को निर्वाचनमा पनि प्रतिनिधिसभा तर्फ महासेठले यादवलाई पराजित गरेका थिए ।
धनुषा निर्वाचन क्षेत्र नम्बर ३ बाट महासेठकी पत्नी जुली कुमारी महतो (महासेठ) पनि निर्वाचित भएकी छन् । उनले पूर्वमन्त्रीसमेत रहेका लोकतान्त्रिक समाजवादी पार्टीका वरिष्ठ नेता अनिलकुमार झालाई पराजित गरेकी छन् ।
