वीरगञ्ज । मधेस प्रदेशका वन तथा वातावरण मन्त्री रमेशप्रसाद कुर्मी लोकतान्त्रिक समाजवादी पार्टी नेपाल (लोसपा) को उपाध्यक्षमा मनोनीत भएका छन् ।
लोसपाले सोमबार आफ्नो पदाधिकारी र केन्द्रीय समिति विस्तार गर्दै मन्त्री कुर्मीलाई उपाध्यक्षमा मनोनीत गरेको हो ।
पर्सा निर्वाचन क्षेत्र नम्बर २ (ख) बाट दोस्रो कार्यकालका लागि प्रदेशसभा सदस्यमा निर्वाचित कुर्मी हाल मुख्यमन्त्री सरोज यादव नेतृत्वको सरकारमा बन तथा वातावरण मन्त्री छन् । कुर्मी संविधानसभा सदस्य पनि हुन् ।
लोसपाले ६३ जना पदाधिकारी चयन गरेको छ । एक अध्यक्ष, तिन वरिष्ठ नेता, एक वरिष्ठ सह-अध्यक्ष, ६ वरिष्ठ उपाध्यक्ष, १५ उपाध्यक्ष, १६ महासचिव, ८ सह-महासचिव, ११ सचिव, एक कोषाध्यक्ष, एक सह-कोषाध्यक्ष र एक प्रवक्ता चयन गरेको छ । त्यस्तै पार्टीले एक सय ८४ जनालाई केन्द्रीय सदस्य चयन गरेको छ ।
महन्त ठाकुरलाई अध्यक्ष, राजेन्द्र महतो, शरतसिंह भण्डारी र अनिलकुमार झालाई वरिष्ठ नेता तथा सर्वेन्द्र नाथ शुक्ललाई वरिष्ठ सह-अध्यक्ष बनाइएको छ । त्यस्तै जितेन्द्रप्रसाद सोनार (सोनल), लक्ष्मणलाल कर्ण, उमाकान्त झा, अकवाल अहमद शाह, निर्जला राउत र प्रदीप नारायण यादवलाई वरिष्ठ उपाध्यक्ष बनाइएको छ । निर्जला राउतलाई कोषाध्यक्षको पनि भूमिका दिइएको छ ।
