आइसीसी ट्वान्टी–२० क्रिकेट विश्वकप छनोटमा नेपालले आज ओमानसँग खेल्दैछ। त्रिवि क्रिकेट मैदानमा हुने नेपाल र ओमानबीचको खेल अहिले बिहान ९ बजे सुरु हुनेछ।
समूह ‘ए’ मा रहेको नेपालले आफ्नो सेमिफाइनल अघिको खेलमा ओमानसँग खेल्न लागेको हो। यसअघि दुई वटा म्याच खेलेको नेपालले दुबैमा जित हात पारिसकेको छ र सेमिफाइनलमा पुगिसकेको छ।
आजको खेलमा जित हात पार्दै नेपाल समूह विजेता बन्न चाहन्छ।
आजै हुने अन्य खेलमा हङकङ र युएई, सिङ्गापुर र मलेसिया तथा बहराइन र कुवेतबीच प्रतिस्पर्धा हुनेछ।
हङकङ र युएईबीचको खेल बिहान ९ बजे मूलपानी क्रिकेट मैदानमा हुनेछ भने सिङ्गापुर र मलेसियाबीचको खेल दिउँसो १ः१५ बजे त्रिवि क्रिकेट मैदानमा हुनेछ। यस्तै बहराइन र कुवेतबीचको खेल दिउँसो १ः १५ बजे मूलपानी क्रिकेट मैदानमा सुरु हुनेछ।
समूहका शीर्ष दुई टोली सेमिफाइनलमा पुग्नेछन्। फाइनलमा पुग्ने दुई राष्ट्र आगामी सन् २०२४ मा अमेरिका र वेस्ट इन्डिजमा संयुक्त रूपमा आयोजना हुने ट्वान्टी–२० विश्वकपमा स्थान बनाउनेछन्।
