बारा,१४फाल्गुन:बारामा अनुचित लेनदेन (मिटरब्याज) मा परेका निवेदनमाथि सुनुवाइ गर्दै २१ बिगहाभन्दा बढी जग्गा फिर्ता गराइएको छ।आपसी सहमतिमा ८३ कित्ताको २१ बिगहा १५ कठ्ठा १६ धुर जग्गा फिर्ता गराइएको जिल्ला प्रहरी कार्यालय बाराले जानकारी दिएको हाे।
जिल्ला प्रशासन कार्यालय बारामार्फत तीन हजार तीन सय २२ उजुरी परेको थियो। २०८० वैशाख १७ गतेदेखि माघ मसान्तसम्म ६७५ वटा उजूरीमा मिलापत्र भएको बाराका प्रहरी प्रवक्ता प्रहरी नायब उपरीक्षक दधिराम न्यौपानेले जानकारी दिए। उजुरीमा २३ करोड ९२ लाख ३१ हजार सात सय ८२ रुपैयाँ माग दावी गरिएको थियो।
दुबै पक्षको सहमतिअनुसार १५ करोड १९ लाख ३७ हजार चार सय ११ रुपैयाँपनि फिर्ता गराइएको उनले बताए।
अनुचित लेनदेन ( मिटरब्याज ) सम्बन्धी समस्या समाधान गर्ने प्रयोजनार्थ २०८० वैशाख १७ गतेदेखि जिल्ला प्रशासन कार्यालय बारामा उजुरी दर्ता गर्न सुरु गरिएको थियो। यस्तै, फागुन १ गतेदेखि फागुन १३ गतेसम्म आइतबार सम्म जिल्ला प्रहरी कार्यालयमा १०४ वटा उजूरीमा दुवै पक्षबिच मिलापत्र भएको न्याैपानेले जानकारी दिए ।
