वीरगञ्ज महानगरपालिका वडा नं. २१ ले जारी गरेको एक सूचनाले शैक्षिक, प्रशासनिक र सार्वजनिक चेतनाको तहमा गम्भीर प्रश्न उठाएको छ । आज जारी उक्त सूचनामा २०८१ सालको SEE (एसईई) परीक्षा “उत्तीर्ण” गरेका विद्यार्थीहरूको नाममा प्रमाणपत्रहरू ७ दिनभित्र बुझाउन भनिएको छ — तर यथार्थ यति हास्यास्पद छ कि एसईईको नतिजा नै अहिलेसम्म प्रकाशित भएको छैन ।
वडाध्यक्ष राधाकृष्ण साह रौनियारद्वारा हस्ताक्षरित सूचनामा विद्यार्थीहरूलाई नागरिकता वा जन्मदर्ता प्रमाणपत्र, एसईई पासको मार्कसिट र अन्य प्रमाण बुझाउन आग्रह गरिएको छ । तर नतिजा नै नआएको अवस्थामा कसले पास गर्यो्, कसले गरेन भन्ने नै अज्ञात छ । यस्तो अवस्थामा सूचनाको वैधानिकता, व्यावहारिकता र तार्किकतामाथि नै गम्भीर शंका उठाइएको छ ।
के यो सम्मान कार्यक्रम वा प्रचारको हतार ?
सामाजिक सञ्जाल प्रयोगकर्ताहरुले प्रश्न उठाएका छन्, “के यो विद्यार्थी सम्मान कार्यक्रम हो कि वडाध्यक्षको प्रचारको हतार हो ? संवेदनशील विषयमा गम्भीर सोचबिना सूचना निकाल्नु गैरजिम्मेवार कदम हो ।” यसबाहेक, सूचनामा नतिजा आउनासाथ बुझाउनुहोस् भन्ने स्पष्टता पनि दिइएको छैन , जसले विद्यार्थीहरूलाई झन दिग्भ्रममा पारेको छ।
आलोचना किन जरुरी?
शिक्षा क्षेत्रमा कुनै पनि कार्यक्रम घोषणा गर्नु पूर्व तथ्यमा आधारित, यथार्थपरक र समयसापेक्ष निर्णय लिइनु आवश्यक हुन्छ। यो सूचना त्यसको उल्टो उदाहरण बनेको छ ।
यसले न केवल प्रशासनप्रतिको विश्वासमा आघात पुर्याबएको छ, तर वडास्तरको निर्णय क्षमतामाथि नै प्रश्न उठाएको छ । यदि यस्ता अव्यवस्थित सूचनाहरू झन् बढ्दै गए भने, विद्यार्थीहरू शैक्षिक मार्गनिर्देशनको साटो प्रशासनिक उल्झनमा फस्नेछन् ।
निष्कर्ष
सम्मानको नाममा अव्यवस्था र प्रचारको हतारले विद्यार्थीहरूको भावनासँग खेलबाड गर्नु हुँदैन। वडास्तरमा लिइने प्रत्येक निर्णयले शैक्षिक संवेदनशीलता, समयको सान्दर्भिकता र यथार्थपरकता बोकेको हुनुपर्छ। अन्यथा, यस्तो प्रशासनिक लापरबाहीले भविष्यमा गम्भीर प्रभाव पार्न सक्छ ।
