सिर्सिया नदीको प्रदूषण नियन्त्रण र संरक्षणबारे वीरगञ्जमा सरोकारवाला निकायबीच विशेष अन्तर्क्रिया सम्पन्न भएको छ। उद्योग विभाग पर्साको आयोजनामा होटल भिस्वामा आयोजित कार्यक्रममा विभागका महानिर्देशक सुशील साह अध्यक्ष थिए।
कार्यक्रममा वीरगञ्ज महानगर प्रमुख राजेशमान सिंह, पर्सा र बाराका प्रमुख जिल्ला अधिकारी, उद्योग वाणिज्य संघका पदाधिकारीलगायत विभिन्न संघसंस्थाका प्रतिनिधिको सहभागिता थियो।
छलफलमा नदीको जल गुणस्तरमा आएको गिरावट, औद्योगिक फोहोर, अतिक्रमण र फोहोर व्यवस्थापन चुनौतीबारे गम्भीर बहस भएको थियो। सहभागीहरूले ठोस नीति, निगरानी संयन्त्र, जनचेतना र दीर्घकालीन कार्ययोजना आवश्यक रहेको बताए।
कार्यक्रममा नदी संरक्षणलाई अभियानका रूपमा अघि बढाउने प्रस्ताव समेत प्रस्तुत गरिएको थियो। समन्वित प्रयासबाट मात्र सिर्सिया नदीको दीर्घकालीन सरसफाइ सम्भव हुने निष्कर्ष निकालिएको छ।
