बाराको सिमरा क्षेत्रबाट लागूऔषध ब्राउन सुगरसहित एक युवक पक्राउ परेका छन्। जिल्ला प्रहरी कार्यालय बाराले दिएको जानकारीअनुसार, सिमरा उपमहानगरपालिका–७ स्थित रेलवे लाइन टोलबाट कृष्णराजकुमार भनिने ३० वर्षीय सोहन कुमार कुर्मीलाई लागूऔषधसहित नियन्त्रणमा लिइएको हो।
विशेष सूचनाको आधारमा इलाका प्रहरी कार्यालय सिमराको टोलीले बिहीबार बिहान ८:३० बजे कुर्मीलाई चेकजाँच गर्दा उनको साथमा २.०४ ग्राम ब्राउन सुगर जस्तो देखिने पदार्थ फेला परेको हो। उक्त पदार्थ डिजिटल तौलमा तौल गर्दा समेत लागुऔषध ब्राउन सुगर पुष्टि भएको प्रहरीले जनाएको छ।
पक्राउ परेका कुर्मीमाथि आवश्यक कारबाहीका लागि जिल्ला प्रहरी कार्यालय बारामा थप अनुसन्धान भइरहेको प्रवक्ता प्रहरी निरीक्षक विजयराज पण्डितले जानकारी दिए।
प्रहरीका अनुसार, लागुऔषध कारोबार नियन्त्रणका लागि सशक्त अभियान जारी राखिएको छ।
