हालै सञ्चारमाध्यममार्फत बहुअरीस्थित श्री शारदा माध्यमिक विद्यालयमा सञ्चालित स्वास्थ्य सहायक (एच.ए.) परीक्षा केन्द्रमा चिटचोरी भइरहेको भन्ने हाला सार्वजनिक भएपनि विद्यालय प्रशासनले त्यसलाई पूर्णतया असत्य र भ्रमपूर्ण बताएको छ ।
विद्यालयका प्रधानाध्यापक अनिलकुमार बर्नवालले जारी गरेको विज्ञप्तिमा परीक्षा अत्यन्तै व्यवस्थित, शान्तिपूर्ण र निष्पक्ष वातावरणमा भइरहेको स्पष्ट पारिएको छ । उहाँका अनुसार परीक्षक, निरीक्षक तथा कर्मचारीहरू पूर्ण जिम्मेवारीपूर्वक खटिएकाले विद्यार्थीहरूले पनि अनुशासनका साथ परीक्षा दिइरहेका छन् ।
प्रधानाध्यापक बर्नवालले मेहनती विद्यार्थीहरूको भविष्यसँग खेलवाड हुने कुनै पनि गतिविधि प्रोत्साहन नगर्ने विद्यालयको अडान रहेको भन्दै अभिभावक र सरोकारवालालाई भ्रममा नपर्न आग्रह गर्नुभएको छ । साथै, विद्यालय प्रशासनले पारदर्शिता कायम गर्न आवश्यक सम्पूर्ण तयारी गरिएको जनाएको छ ।
