मधेस प्रदेश सरकारलाई नेपाली कांग्रेसले दिएको समर्थन फिर्ता लिएको छ । आज बिहान जनकपुरमा बसेको संसदीय दलको बैठकले मुख्यमन्त्री सतिस कुमार सिंह नेतृत्वको सरकारलाई दिएको समर्थन तत्काल प्रभावबाट फिर्ता लिने निर्णय गरेको हो ।
कांग्रेस संसदीय दलका नेता कृष्णा यादवका अनुसार सांसदहरूको सुझावअनुसार सरकारमा नबस्ने निष्कर्ष निकालिएको र सोअनुसार समर्थन फिर्ता लिइएको हो । उनका अनुसार मन्त्रीहरूलाई पनि आजै फिर्ता बोलाउने तयारी भइरहेको छ ।
सिंह नेतृत्वको सरकारबाट कांग्रेस करिब १६ महिनापछि बाहिरिएको हो । यसअघि भदौ २८ गते जनमत पार्टीले पनि समर्थन फिर्ता लिएको थियो ।
चार दलीय गठबन्धनमा बनेको सरकारलाई हालसम्म कांग्रेस र जनमत दुबै दलले समर्थन फिर्ता लिएकाले अब एमाले र लोसपा मात्रै सहभागी रहेका छन् ।
