आगामी फागुन २१ गते हुने आमनिर्वाचनको तयारीलाई लिएर निर्वाचन आयोगले राजनीतिक दलहरूसँग संवाद सुरु गर्ने भएको छ । आयोगका अधिकारीहरूका अनुसार निर्वाचन कार्यतालिका सार्वजनिक गरेलगत्तै दलका प्रतिनिधिहरूसँग छलफल गर्ने तयारी भइरहेको छ ।
संवादमा आचारसंहिता, प्रचलित ऐनको पालना, उम्मेदवार छनोटसम्बन्धी कानुन कार्यान्वयन लगायत विषयमा आयोगले दललाई स्मरण गराउने छ भने दलहरूले व्यवहारिक कठिनाइ तथा सुझाव राख्नेछन् ।
आयोगका सूचना अधिकारी सुमन घिमिरेका अनुसार मतदाता नामावली संकलनका लागि भोलि (शुक्रबार)देखि कात्तिक महिनाभर समय उपलब्ध हुनेछ । सो प्रक्रिया सकिएपछि मतदाता नामावली सार्वजनिक गर्ने तयारी गरिएको उनले बताए ।
यसैबीच, आयोगले राष्ट्रिय सभाको निर्वाचनसमेत समयमै सम्पन्न गर्ने तयारी गरेको छ । एक आयुक्तका अनुसार आयोगलाई यसमा कुनै चुनौती छैन । उनले भने, “सात प्रदेशमा सात निर्वाचन अधिकृत तोक्ने हो, मतदाता त फिक्स्ड नै छन्, निलम्बनमा परेकाहरू र मृत्यु भएकालाई मात्र घटाउने काम हो ।”
