जेन–जी आन्दोलनका क्रममा काठमाडौंको केन्द्रीय कारागार जगन्नाथदेवलबाट फरार भएका कर्तव्य ज्यान मुद्दाका एक कैदीलाई प्रहरीले पक्राउ गरेको छ ।
पक्राउ पर्नेमा पर्सा जिल्ला कालिकामाई गाउँपालिका–५ सिमरा निवासी ४० वर्षीय मुक्तिनारायण कुर्मी रहेका छन् । जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डिएसपी) हरि बहादुर बस्नेतका अनुसार कुर्मीले आफ्नै ३५ वर्षीया श्रीमती सङ्गीता देवी कुर्मीको घाँटी थिचेर हत्या गरेको अभियोगमा पर्सा जिल्ला अदालतले २५ वर्षको कैद सजाय सुनाएको थियो । उनको कैदी नम्बर ३८८८१६८ रहेको प्रहरीले जनाएको छ ।
विशेष सूचनाको आधारमा इलाका प्रहरी कार्यालय पोखरियाबाट खटिएको टोलीले मङ्गलबार साँझ ७:३० बजे कुर्मीलाई आफ्नै घरबाट पक्राउ गरेको हो ।
कुर्मी गत भदौ २४ गते भएको जेन–जी आन्दोलनकै अवसरमा कारागारबाट फरार भएका थिए । फरार भएयता उनी गाउँमै लुकेर बस्दै आएको प्रहरीले जनाएको छ ।
