पोखराको लिची बगान जग्गा घोटाला प्रकरणमा दुई पूर्वमन्त्रीसहित सात जनाविरुद्ध भ्रष्टाचार मुद्दा दर्ताका लागि अख्तियार दुरुपयोग अनुसन्धान आयोग विशेष अदालत पुगेको छ। उनीहरूविरुद्ध ७८ लाख रुपैयाँ बिगो मागदाबी गरिएको अख्तियारका प्रवक्ता राजेन्द्र कुमार पौडेलले जानकारी दिए।
पूर्वमन्त्री राजकुमार गुप्ता र रञ्जिता श्रेष्ठसहितका सात जनाविरुद्ध मुद्दा दर्ता प्रक्रिया अहिले विशेष अदालतमा रुजु भइरहेकाको बताइएको छ। जग्गा हिनामिना गर्ने उद्देश्यले गरिएको घूस सम्झौतासम्बन्धी अडियो सार्वजनिक भएपछि अख्तियारले अनुसन्धान अघि बढाएको थियो। सोही अनुसन्धानका आधारमा अख्तियारले पूर्वमन्त्रीद्वय र बिचौलियासहित अन्य व्यक्तिमाथि मुद्दा दायर गरेको हो।
