निर्वाचन आयोगसँग सांसद पदको उमेर सीमा घटाउन माग गरिएको छ। जेन-जि पुस्ताका युवा प्रीयान्सु चौरसियाले सामाजिक सञ्जालमार्फत आयोगलाई सांसद पदको उम्मेदवार बन्ने उमेर २५ वर्षबाट घटाएर १८ वर्ष गर्न आग्रह गरेका छन्।
चौरसियाले लेखेका छन्, “निर्वाचन आयोगसँग मेरो अनुरोध छ — सांसद उमेदवारको उमेर २५ वर्षबाट घटाएर १८ वर्ष गरिदिनुपर्यो। हामी जेन-जिलाई चुनाव नै लड्न मिल्दैन भने हाम्रो सहभागिता कसरी होस्?”
उनको यो भनाइ अहिले सामाजिक सञ्जालमा निकै चर्चामा छ। धेरै युवाले उनको समर्थन गर्दै टिप्पणी गरेका छन् ।
चौरसियाले थप लेखेका छन्, “नयाँ पुस्ताको सोच र दृष्टिकोणलाई प्रतिनिधित्व गर्ने अवसर नदिँदा राजनीतिमा पुस्तान्तरण ढिलो हुँदै गएको छ। युवालाई निर्णय–निर्माण तहमा ल्याउन कानुनी सुधार आवश्यक छ।”
विश्लेषकहरूका अनुसार नेपालमा सांसद बन्नका लागि संविधानले २५ वर्ष र राष्ट्रपति बन्नका लागि ४५ वर्ष उमेर सीमा तोकेको छ। प्रीयान्सुको मागले युवाबीच राजनीति र नीति–निर्माणमा उमेरको सीमा सम्बन्धी बहसलाई पुनः ताजा बनाएको छ।
