काठमाडौं । अख्तियार दुरुपयोग अनुसन्धान आयोगले मालपोत कार्यालय पर्साका तत्कालीन चार जना मालपोत अधिकृतसहित ८ जनाविरुद्ध विशेष अदालत काठमाडौंमा भ्रष्टाचार मुद्दा दायर गरेको छ ।
मालपोत अधिकृतहरू हरिनारायण मिश्र, भूपबहादुर बोगटी, पदमप्रसाद अर्याल र सुरेन्द्रप्रसाद राव कुर्मीसहितका प्रतिवादीहरूले आर्थिक वर्ष २०७०/७१ मा रजिस्ट्रेसन फाँट ‘ग’ बाट उठेको २ करोड ९३ लाख ६८ हजार ५६५ रुपैयाँ राजस्व हिनामिना गरेको आरोप छ ।
अख्तियारले मिश्रसँग ३८ लाख ८० हजार ३६८, बोगटीसँग १ करोड १० लाख ६० हजार ५२४, अर्यालसँग २१ लाख ३८ हजार १६९ र कुर्मीसँग ९९ लाख १० हजार ५२५ रुपैयाँ बिगो दाबी गरेको छ ।
यस्तै, तत्कालीन नायब सुब्बा स्व. किरणप्रसाद उपाध्यायका हकमा उनका अंशियार छोराहरू राजकिशोरप्रसाद, गौतमप्रसाद, पशुपतिप्रसाद र मुरारीप्रसाद उपाध्यायसँग समेत उक्त रकम बराबरको बिगो दाबी गरिएको आयोगले जनाएको छ ।
